Ramin Allahverdi

 HƏSRƏTİN ZİNDANIM OLUB

Həsrətin zindanım olub

Görə bilmirəm səni,

Bu zindandan çıxar məni.

Çıxar gedək evimizə,

Gedib bir az savaşarıq

Tez küsüb, tez barışarıq.

Savaşıb yorulanda,

(Bulanıb durulanda...)

Baş qoy sinəm üstünə

Eşqin içimdə sönməmiş.

Dünyaya etibar yox...

Qulaq asarsan səsinə

Ürəyim daşa dönməmiş!

20.01.2020

Hara gedirsən

Axı, hara gedirsən?

De, bilim sonra çıx get.

Qoyma evi yiyəsiz,

Qoy gəlim sonra çıx get.

Ətəyi daşdı getmə,

Şeytanı daşda, getmə,

Gözləri yaşdı getmə,

Gəl silim sonra çıx get.

Mən də evə gəlmərəm,

Yas tutaram gülmərəm,

Sənsiz ölə bilmirəm,

Gəl, ölüm sonra çıx get.

Avqust 2009